John 14
E Isu i Vakasihomo e Huriki a Murimuri
1“Naha ni loholege lae na hatene mua. Mu luhoi torea a Vure, mu luhoi tora iau. 2A roho ne Tata i ngavaka. Iau ga muga ga pelekado puru a murine mua. Bara i uka, i uka ma ga takia mua vona a ngava iea. 3 aIau ga muga, ga pelekado puru a murine mua. Muri bara hamule valai tabu, a tuli mua, si gi made palupu. 4Mu lohoka vona pali a dala na tanga ga lakea vona.”E Isu a Dala
5Lakea e Tomas i nanea e Isu, “Bakovi Dagi, i uka ma mi lohoka vona a hini go lakea vona. Mi gi lohoka navai na dala?”6 bE Isu i koli, i ta maea, “Iau a dala, iau a nita muholi, iau a nimahuri. E huriki ri ngaru ni lakea ne Tata ri gi valai taro nau. 7 cMua bara mu lohoka muholi nau, e Tata tara bara mu lohoka vona. Ngane mu vakatubu ni lohoka vona, a vuhuna mu masia pali.”
8Lakea e Pilip i ta maea, “Bakovi Dagi, o vakasiri mia vona e Tamamu, lakea i uka ma mi gi nana tabu.”
9 dE Isu i koli, i ta maea, “Pilip, iau a made tabaka pali turane mua, pali i navai i uka ma o lohoka nau? E huriki ri matai iau, ri masia e Tata. I navai a hini o ta maea, ‘O vakasiri mia vona e Tamamu.’ 10 eRa ioe, o luhoi iau na tahuna a taki maria e Tata miri manga a viri ala taku, o i uka? A ngava a taki mua vona i uka ma a ngavagu. A ngavane Tata. E Tata i made turagu, i rata a leho vona. 11 fMu luhoi iau na tahuna a taki maria e Tata, miri manga a viri ala taku. Pali mua bara mu koi ni luhoi iau, a ngaru mu gu matai a maka nivakasiri a rata, lakea mu gu luhoi tora iau. 12 gA taki muholi mua, e huriki ri luhoi tora iau bara ri rata a maka maki iau a rata. Bara ri rata a maki dagi hateka na maki a rata pali, a vuhuna iau bara hamule lakea ne Tata. 13 hA ra maki mu nana iau vona na ragu, bara rata. Na naro iea kunana, iau a Tuna Vure, ga ratea a rane Tata ge bele dagi. 14A ra maki mu nana iau vona na ragu, bara rata. 15 iMua bara mu ngaru iau, bara mu muri mai a ngavagu.
A Hanuna Vure
16 j“Ga takia e Tata ge rudu vilia ne mua a viri tara ge tuhori mua, ge made turane mua na parava vakaroro. 17 kRa viri ge tuhori mua, a Hanu na Nita Muholi. E huriki na malala ri keri ni bolea, a vuhuna i uka ma ri masia, i uka ma ri lohoka vona. Pali mua mu lohoka vona, a vuhuna i made turane mua. Muri ge made pololilo ne mua.18“Iau i uka ma ga pe mua mu gu manga a duku. Bara hamule valai ne mua. 19I uka ma ge tabaka, e huriki na malala i uka ma ri gi matai iau, pali mua bara mu matai iau tabu. Mua bara mu mahuri mule a vuhuna iau a mahuri. 20 lNa parava iea bara mu lohoka vona e Tata i made turagu, mua mu made turagu, iau a made turane mua. 21E rei a viri i longo mai a nitagu, i ramai, ia a viri i ngaru iau. A viri i ngaru iau, e Tata tara i ngarua, iau tara a ngarua, bara vakasiri iau vona.”
22Muri e Iudas (i uka ma e Iudas Iskariot) i nanea, “Bakovi Dagi, i navai go vakasiri ioe ne mia, pali o koi ni vakasiri ioe ne huriki na malala?”
23E Isu i koli, i ta maea, “E rei a viri i ngaru iau, bara i longo mai a ngavagu. E Tata bara i ngarua, lakea bara miri bele vona, miri made turana. 24 mA viri i uka ma i ngaru iau, i uka ma i longo mai a ngavagu. Ra ngava mu longo i uka ma a ngavagu. A ngavane Tata, ra i rudu iau a valai.
25“A ngava nga a taki na tahuna a tabana ni made turane mua. 26Pali na tahuna e Tata ge rudu vilia na ragu a viri ge tuhori mua, ra Hanu Kiripiripi, bara i tovo mua vona a maki lobo, ge rata mua, mu longovisi tabu a maka maki a taki mua vona pali. 27Iau a habi a nivalemu ne mua. A nivalemu nau a habi ne mua. I uka ma a habi a nivalemu ne mua ge manga e huriki na malala ri habi. Naha ni loho lege lae, naha ni mangenge.
28 n“Mu longo pali iau a ta maea, ‘Iau ga vano, muri ga hamule valai tabu.’ Mua bara mu ngaru iau, bara mu vivi vona a hini iau ga hamule lakea ne Tata, a vuhuna i dagi hateka nau. 29 oA taki muga mua vona ngane a maka ngava nga, muri bara ri bele. I mavonga kunana na tahuna a maka maki nga ri bele, bara mu luhoi tora iau. 30I uka ma ga ta vilihui lokovonga, a vuhuna a matakari na malala ta ge valai ngane. Pali i uka nitora ge ratea nau. 31Pali iau a muri mai a ngavane Tata i taki iau ga ratea, lakea e huriki lobo ri gi matakilala iau a ngaru hatekea e Tata. Mu valai ngane, si vano.”
Copyright information for
BNP